Üfwermo fer d Hochtüro Saiso
| Eigentli were ja z Strahlhoro ufom Programm gsi, aber das isch – wie d ander Türe an däm Wuchunänd – abgseit wordo. Der Dominic und Samuel hend allerdings es Alternativ-Programm ageboto; treu na dom Motto: „Den Mutigen gehört die Welt!“. Alle wo schich fer z Strahlhoru igschribo hend, hend schich de abgmäldot und z Astrid und ich si spontan igschrungo und mim Dominic und Samuel z Bärg gango. Also, d Wartelischta lohnt schich scho.
Wier hei isch am 5i bim Staudamm getroffu. Grossi Hoffnig uf en grandiosi Üssicht uf es Näbelmeer mit Bärgpanorama hei wer kä und so si wer losglufo. Zersch dom See entlang und de links ins wunderschön Ofotal igebogu. Während der Wanderig durchs Ofotal het schich ab und züe der Näbel en biz effnot und en Blick uf de Bärga züegla. |
||
 |
 |
|
| . | ||
 |
||
| Aber meischtens bin i mer en biz wie z Schottland vorchu. Villicht het eifach der Samuel z Wätter vo da mitgebrungo.
Ändi Ofotal geiht’s uber es Schneefäld embrüf Richtig Jazzilicka (3,081 m). Da geiht’s ufer Piangersita scho vellig z Loch ab. Da sie wer nu en paar Meter Richtig Antronapass gango und de di Tschugge obschi ufs Jazzihorn (3,227 m). Da hets nu vellig Schnee ufom Grat kä in Richtig Stellihoro. Isch aber tiptop gango. Mit där Üssicht het mo scha de uf d Wäg konzentriert Der Üfstieg auf’s Stellihorn (T6 – WS) isch uber Gröll und en paar interessante Klätterpartie gango. Wier si immer am Südoschtgrat entlang und em Schluss het’s nu en paar üsgsetzti Schtelle ghä. Am Eis si wer de ufom Stellihoro (3,436 m) acho. Nachher si wer witer Richtig Schtelli (3357 m). Es het apa so es Zähnerli Schnee uf dom loos Gröll khä und das het mo scha gat miesso konzntriero wie mo de Tschalpie dartüet. Vom Schtelli si wer de d Weschtflanka embri. Z meischta uber Gröll, aber wenn wer eswo Schneefälder gseh hei, si wer immer da eis ga sleido. Zunersch nu uber en paar Matte, ane Geis vam Baschi ferbi und Direttisima zum Pier. |
Alles in allom en tiptopi Sach gsi mit ällschi dri: Wandero, uber Schneegrata, Blockklätteri. Güeti Afang vo der Türosaiso gsi.
Es grossos Merci an de Dominic und Samuel, dass er isch wieder z Bärg gnu heit.
Andreas
