Fröiwerpower am Gspaltehorn
| Schwierigkeit | ZS- 3a | |
| Zeitbedarf | 2 Tage | |
| Aufstieg | 2100 hm | |
| Abstieg | 2100 hm | |
| Strecke | Griesalp – Gspaltenhornhütte – Bütlassesattel – Gspaltenhorn – Gspaltenhornhütte – Moränenweg – Griesalp |
Zersch bini ufer Wartelischta gsi, uf z mal siwer zwei z’wenig gsi. Höiptsach äs het klappt – troffe häni d Diana und d Sandra z Visp ufem Parkplatz. Z Wätter isch perfekt gsi und nachem Autoverlad Lötschbärg hewer d Conny z Reichenbach troffe und sii in es Minipostauto igstige wa Werbig het gmacht mit „die steilste Postautostrecke Europas“. Ich hämmer numme deicht „ier Bärner sid apa no nie im Wallis cho Postauto fahre“, aber oho im Oberland hets de öi stotzendi Strasse! Dr Busfahrer isch es richtigs Original gsi und het oi en zimlichi Show gmacht mit tiri üftüe bim Wasserfal zum chielle und Häx im Bach usw. Scho z erscht Highkight ufer Areis zer Kienalp.
Vo da witer z Füess durch z Kiental bis z hinnersch i, wa z alle sitte Wasser isch embriechacho. Derewäg vill, dases an einem Ort sogar es Schirmdepot het kä. Summi heint aber de wäge dr Hitz ufe Schirm verzichtet zum schich en biz la netze bi der hitz. Äs het schi de no zimli zoge biswer ufer Gspaltehorehitta si acho.
 |
 |
 |
 |
.
Churz nach dr Amäldig isch en Gruppa gat vom Gspaltehore emieächacho und die sind ei Wätsch gsi. Summi heint schi grad gsetzt und zersch emal d Strimpf üsentwunne va barem Wasser und das no mit Gamasche. De heinsch nisch verzellt dass da obina no en 50er Schnee dri isch vanner letscht Wucha und schi alls heint miesse Spure. Darum sindsch de oi ersch am Namittag em Vieri zrugg gsi. Wier hei enand aglüegt und agfange uberlegge obwer en anneri tüür selle probiere, aber Schnee hets uberall und uber en Gletscher hewer mit dem frische Schnee öi nid gat welle. De hewer halt de abgmacht dass wers probiere und eifach 10:30 als Umcherzit gseid, egal wie wit dass wer sii.
Trotz deluxe-vierer Zimmer im neue Abüw va dr Hitta häni natiirli keis öig züe taa, weiss dr Tiifel warum. Appa z vill da dene feine Spaghetti embritaa… Am 04:30 siwer zwäggange biner hitta und gat z rächter Zit zum Sunneüfgang 600m heecher ufem Bütlass-Sattel uf 3020m gsi. Scho bis da siwer fasch alls im Schnee gluffe. Z ganz Material üssapackt und agleit und de siwer witter gäg de Grat züe. Dr Schnee isch nid ganz so weichä gsi und de is gange.
Scho bald het die Chlätterii agfange. Darfer dasi zersch mal mit Stiigiise bi chlätteret, die Steina teilwiis zimli glatti sind gsii vam nasse Schnee und links und rächts vam Grat ist 1200m z lochemab gange, hämi gat zimli miesse zäme nä. Vor allem weme da mit Fröiwe unnerwägs isch wa z Wiisshore und die Nose am El Capitan no gat vorem Früehstuck machend, wenns ne gat dernaa isch. D Diana isch de oi flott geduldigi gsi mit mier. Mit dr zit is güet vorwärtsgange und wier sii sogar scho am 09:30 ufem Gipfel gsi bi strahlend blauem Himmel.
Willwer die ganz Strecki bis zum Bütlass-Sattel hei miesse sichere (numme churzi Sticker sind am churze Seil z gaa gsi) hets halt schini Zit brüücht biswer zrug si gsii. Da häni de oi scho gmerkt dass mini Kondition nid gäge die Fröiwerpower achunt – schi hätti wenigschtens chenne so nätt sii und dergliiche tüe als wärisch en biz miedi 🙄
Dr Rückwäg uber d Hitta zum Üsgangspunkt isch mer de oi ca gliich lang vorcho wie dr Jakobswäg, vor allem wills wahrschinli no fasch heisser isch gsii als z Spanie.
Uf jedefall heiwers gschafft und sii emüs cho. Vaner Toureleiteri Diana häni no d Erlöibnis bercho, dass die Tour wäge de schwierige Verhältnis ZS- isch gsi und nid wie geplant es WS, ZS isch öi so zimli das gsi wiens schi ver mich het agfühlt. Es unvergässlichs Erläbnis!
